کچھ ایسے معمے ہیں

ایسا ہے کہ سب خواب مسلسل نہیں ہوتے

جو آج تو ہوتے ہیں مگر کل نہیں ہوتے

کچھ مشکلیں ایسی ہیں کہ آساں نہیں ہوتیں

کچھ ایسے معمے ہیں کبھی حل نہیں ہوتے

شائستگیِ غم کے سبب آنکھوں کے صحرا

نمناک تو ہو جاتے ہیں جل تھل نہیں ہوتے

کیسے ہی تَلاطم ہوں مگر قُلزمِ جاں میں

کچھ یاد جزیرے ہیں کہ اوجھل نہیں ہوتے

سب خواہشیں پوری ہوں فرازؔ ایسا نہیں ہے

جیسے کئی اشعار مکمل نہیں ہوتے

احمد فراز

تبصرہ کرکے اپنی رائے کا اظہار کریں۔۔ شکریہ